VidAs yá una bodega asturiana de creación nueva na que se fan vinos conos estándares de calidá de la Denominación d'Orixe Protexida Cangas.

Los vinos de Cangas prodúcense dende'l sieglu X, asociaos a las necesidades de los monesterios, que fixenon vinos reconocíos n'Europa durante años. Así a todo, “el boom” de la minería na zona nas décadas últimas del sieglu XX feixo cuasi saparcer las viñas. Hai unos 15 años qu'esta situación ta cambiando ya l.luítase por que nun desapareza esta cultura anque la producción seya pequena comparada con outras zonas d'España ou del mundu.

VidAs yá un proxectu familiar que quier contribuir a la conservación ya al desenvolvimientu de la vitivinicultura del Suroccidente asturianu.

Los vinos de VidAs son feitos dafeitu con uvas escoyidas procedentes de las variedades del país: Albarín Blancu, Albarín Negru, Verdéu Negru ya Carrasquín. Esta zona asturiana pequena tien un clima húmedu con temperaturas moderadas que proporcionan un carácter atlánticu a los nuesos vinos. Los vinos tán reconocíos cumo Vinos d'Alta Montaña ou Viticultura Heroica, una marca de calidá que reconoz el trabayu duru asociáu al asitiamientu de las viñas con pendientes de más del 30%.

Por estas condiciones, el trabayu na viña yá manual, sin posibilidá de mecanizáu. Namás outras dúas zonas n'España tienen esta distinción: Ribeira Sacra en Galicia ya Priorat en Cataluña.